Leikskeid / folkedanskurs på måndag

Leikskeid er eit gamalt norsk ord for kurs i folkevisedans, og i ei meir utvida tyding, dansekurs generelt. Ein gong i 1913 kom Klara Semb og heldt det fyrste leikskeidet på BUL Kristiansand, og sidan det har laget hatt mange slike skeid.

I dag tek leikskeida i BUL for seg alle former av folkedans, frå dei eldste bygdedansane med utgåver av gangar og springar, til dei nyare runddansane som vals og masurka, og endåtil folkeswing og tango. I tillegg er songdansen eit fast innslag.

Pris: 50 kr, eller 600 kr for heile halvåret (300 kr for medlemer). Ungdom under 26 kjem inn gratis.

Leikskeid, våren 2025

Kvar kurskveld varer frå 19.00 til 21.00, med unntak av einskilde lengre kurs spesifiserte i oversyna.

Du kan òg fylgje Facebook-sida vår for å få oppdateringar.
Har du spørsmål kan du sende SMS til 99 24 87 89.

Dato	Emne
13. januar	Me får vitjing av Stine Fjellkårstad frå sentralt i Noregs Ungdomslag, som skal snakke om Ungt Demokrati-prosjektet og om vegen vidare og moglegskapar i organisasjonen. Deretter vert det servert snacks, før me avsluttar med dans.
20. januar	Kurs i masurka med Gard Nergaard. Han går gjennom det grunnleggjande fyrst, men etter kvart vert det høve til djupdykk i meir vidarekomen dans.
27. januar	Kl. 18–21: Kurs i reinlendar. Kl. 18–19 vert det grunnkurs, kl. 19–20 vert det samdans på alle nivå, og kl. 20–21 vert øvetime.
3. februar	Kurs i telegangar og telespringar med Sivelin Tarberg.
10. februar	Kl. 18–21: Kurs i vals med Karen. Kl. 18–19 vert det grunnkurs, kl. 19–20 vert det dansar med element frå vals, og kl. 20–21 vert det samdans til levande musikk. Me går òg gjennom telegangar og telespringar frå førre veke i laupet av kvelden.
17. februar	Vinterferie
24. februar	Karen kjem og lærer bort pingasooq frå Grønland, og skotskril.
3. mars	Synne Stray kjem og lærer bort noko, men seier ikkje kva. Kom og sjå for å finne ut kva det er!
10. mars	Grunnkurs i masurka med Gard Nergaard.
17. mars	Kl. 18–21: Repetisjon av grunnleggjande reinlendar kl. 18–19, variasjonar i reinlendar kl. 19–20, og ymse turdansar, rilar og treturar kl. 20–21.
24. mars	Kurs i polka på alle nivå.
31. mars	Sørlandsspringar med Arne Rislaa
7. april	Repitisjon av sørlandsspringar med Arne Rislaa, i tillegg til polka, reinlendar og vals.
14. april	Påskeferie
21. april
28. april	Fyrste del av grunnkurs i pols med Gard Nergaard.
5. mai	Repetisjon av folkedansar, m.a. pols.
12. mai	Andre del av grunnkurs i pols med Gard Nergaard.
19. mai	Kurs i halling med Amalie Bjørnestad Sele.
26. mai	Repetisjon av halling.
2. juni	Sumarendskap med pizza.

Ymist om tiltaket

Det nye leikskeidet på måndagane (til vanleg kalla Måndagsdansen) tok til som del av prosjektet „Korleis skal folkedansen overleva oss?“ frå 23. mars 2022 fram til 16. desember 2024. Prosjektgruppa var samansett av Anne-Beate Guldahl, Arne Rislaa og Liv Arvidsson.

Særlaget har si eiga styringsgruppe som avgjer og set i stand kursa.

Tiltaket har i det meste av tida si vore utan noko skikkeleg namn, men opplæring i folkedans på BUL er ikkje noko nytt, og er det som gjennom tidene har heitt leikskeid og danse- / dansarskeid. Ordet skeid (utt. /ʃɛɪ/) er eit gamalt ord som Noregs Ungdomslag og BUL har vore flinke på å fremja i tidlegare tider. Frå gamalt har ordet hatt ymse tydingar, frå køyreveg mellom åkrar, til kapplaup eller kappriding, som så gav tydinga tida der folk samlast til kappriding, og frå det igjen tydinga tid eller stund i seg sjølv. Det var ikkje før på 1900-talet at det fekk tydinga kurs, og ein kan tenkja seg at den frilynde ungdomsrørsla hadde ein del å seia for at denne bruken slo rot.